1) അർഹതയില്ലാതെ അർഹത തേടുന്നവർ:
----------------------------------------------------------
"നീയ്യെന്തുണ്ടാക്കി?" -അച്ഛൻ!
"ഒന്നുമില്ല!!"-കൂളായ ഞാൻ!
"എങ്കിൽ അർഹത!"-അച്ഛൻ!
"ഇത്‌ നാട്ടു നടപ്പാണ്‌!"-ചൂടായ ഞാൻ!
"നീ കഷ്ടപ്പെട്ടുണ്ടാക്കിയിട്ടു പോരെ തർക്കുത്തരം!"-അച്ഛൻ!
"ഭാഗം വെക്കണം!.. വീതം വെക്കണം!.. വിറ്റു തുലയ്ക്കണം!"
പട്ടച്ചാരായം പോലും മണപ്പിക്കാത്ത ഞാൻ പച്ചവെള്ളം കുടിച്ചട്ടഹസിച്ചപ്പോഴച്ചൻ ശാന്തനായി പറഞ്ഞു.. "..ഇവൻ പട്ടച്ചരായം കൂടി കുടിച്ചെങ്കിൽ നമ്മുടെ ഗതിയെന്താകുമായിരുന്നു.??!"
ഇതെന്റെ അവകാശമാണെന്ന മട്ടിൽ വീതം കിട്ടും വരെ ഞാൻ ചൂടായി കൊണ്ടിരുന്നു!
----------------------------------------------------------------------------------------
2) നാക്കും തോക്കും!
-------------------------
അവൻ തോക്കെടുത്തു ഞാൻ നാക്കും.
അവൻ വെടിവെച്ചു കൊന്നതിനേക്കാൾ വേഗം ഞാൻ നാക്കുകൊണ്ട്‌ അരിഞ്ഞു വീഴ്ത്തി!
3)സന്ദേഹം:-
-----------------
സമയമില്ലെന്നറിഞ്ഞിട്ടും ഞാൻ സമയം കടമെടുത്തെഴുത്തിനിരുന്നു... നിന്നോട്‌ സംവദിക്കുവാൻ ആഗ്രഹമുണ്ടായിട്ടും ഭയപ്പെട്ട്‌ ഞാൻ പേനയൊളിച്ചുവെച്ച്‌ കടമെടുത്ത സമയം കൊന്നു തീർത്തു!!
4) ആവലാതി
-------------------
"..എന്തിനേയാണ്‌ നീ ഭയക്കുന്നത്‌?" അവന്റെ ചോദ്യം മുഴങ്ങി..
"..നീയ്യെന്റെ കൂട്ടുകാരനാണെന്ന് പറഞ്ഞപ്പോൾ ആദ്യം ഭയന്നു.. നീയ്യെന്റെ ബന്ധുവെ ന്നറിഞ്ഞപ്പോൾ നടുങ്ങി മോഹാൽസ്യപ്പെട്ടു... എന്റെ പോക്കറ്റ്‌ കാലിയായത്‌ നീയ്യോഴികെ ഞാനാരൊടും പറഞ്ഞില്ല"- ചോദ്യമെറിഞ്ഞ അവൻ എന്റെ ഉത്തരം കേൾക്കാൻ നിൽക്കാതെ, തീരെ സമയമില്ലാത്ത പോലെ ബൈക്കെടുത്ത്‌ പാഞ്ഞു..ബാറിന്റെ കോലായിൽ എന്നെ കാത്ത്‌ അവനിരിപ്പുണ്ടത്രേ!.. എന്നെ പോലും കൂടെ കൂട്ടാത്തത്ര തിടുക്കം!!
====================================================================
(...ഞാൻ അഹങ്കാരിയെന്നോ?... ദുഷ്ടനെന്നോ?... കഷ്ടം!.. എന്നിലെ എന്നെ, വായിക്കുന്ന നിന്നിലെ നീയ്യിലേക്ക്‌ സന്നിവേശിപ്പിച്ച്‌ എല്ലാമുപേക്ഷിച്ച്‌ എന്നേ ഞാൻ മരവുരിയെടുത്തിരുന്നു!!.. എനിക്ക്‌ സമയം പരിമിതമാണ്‌ ...എനിക്ക്‌ കാഴ്ച കണ്ട്‌ അത്ഭുതപ്പെട്ട്‌, പൊട്ടിക്കരയുന്നതു കണ്ട്‌ വിങ്ങി കരഞ്ഞ്‌, ആഹ്ലാദിക്കുന്നത്‌ കാണുമ്പോൾ ചിരിച്ച്‌ സന്യസിക്കണം!..ചുറ്റിലും പുഞ്ചിരിക്കുന്ന മുഖങ്ങൾ കണ്ട്‌ കണ്ണടയ്ക്കണം!.. പുഞ്ചിരിക്കുന്നത്‌ പഠിക്കാനാണ്‌ ഞാൻ നിങ്ങൾക്കരികിലേക്ക്‌ ശിഷ്യനായി നടന്നടുത്തത്‌..നന്നായി കരയാൻ എനിക്കറിയാം.. ഒരു പാട്‌ എക്സ്പീരിയൻസേൻ പുറകിലുണ്ട്‌! )
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ