ത്യാഗസ്മരണകൾ..

ഒറ്റിക്കൊടുക്കുന്നവരെ നോക്കി
ഒരു നിമിഷം!
“ഇതാ എന്റെ രക്തം!”
ഇടറിയ ശബ്ദത്തിൽ യേശു.

അനന്തരം അവർ
യേശുവിന്റെ മാംസം
വളഞ്ഞു കൂടിയിരുന്ന് തിന്നു..

യാതൊരു ഉളുപ്പുമില്ലാതെ,
ചോര കുടിച്ചു,
അവസ്ഥയിൽ ഇരുന്നു..
പിന്നെ ഛർദ്ദിക്കുന്നു.
ഒടുവിൽ കൂടിയിരുന്നാലോചിച്ചു.
“എത്ര വെള്ളിക്കാശു കിട്ടും?“

നാണമില്ലാത്തവർ!
അത് കേട്ടാകണം
എനിക്കവരോട് വെറുപ്പുവന്നത്,
യേശുവിനോടു അടങ്ങാത്ത
സ്നേഹവും!
സജ്ജലങ്ങളായോരെൻ കണ്ണുകൾ,
മൊഴിഞ്ഞു,
ഹേ നിരപരാധീ.....
എൻ പ്രീയാ.....
ഇനിയവരുടെ അടുത്തു പോകരുത്!
അവരിനിയും നിന്നെ വിൽക്കും,
തുണ്ടം തുണ്ടമായീ,
അവരിനിയും നിന്റെ വചനം തുപ്പി,
ആളുകളെ ചേർത്ത്,
വെള്ളിക്കാശ് എണ്ണി വാങ്ങും!

പാവം നിഷ്ക്കളങ്കൻ!
ഒരു ചിരി!
ഒരു പൊൻ പുഞ്ചിരി,
ഒപ്പം ത്യാഗമെന്തെന്ന് കാട്ടിയിട്ടും
മനസ്സലിവില്ലാത്ത
അവരോടുള്ള പുച്ഛച്ചിരി!

അപ്പോഴും നനുത്ത രക്തതുള്ളികൾ
കുരിശിൽ നിന്നടർന്നിരുന്നു!
ഒപ്പം സ്മരണപുതുക്കുന്ന
നിഷ്ക്കളങ്കഭക്തരാം പാവങ്ങളുടെ
കണ്ണീരും!