വരവ്, ചെലവ് ,കണക്ക്

പകൽ മുഴുവനലഞ്ഞ മനസ്സ്

രാത്രിയോടാണ്‌ കണക്ക് ചോദിക്കുന്നത്,

രാത്രിമുഴുവൻ അലഞ്ഞ മനസ്സ്

പകലിനോടും,

രാത്രി നൽകുന്ന ഉറക്കം തിരിച്ചു കൊടുത്ത്,

കണക്ക് തീർക്കുമ്പോഴും,

പകലു നൽകുന്ന ഉണരൽ ,

തിരിച്ചു കൊടുത്ത് കടം വീട്ടാമെന്ന്

കരുതിയപ്പോഴേക്കും,

ദീർഘയാമങ്ങളായ്

അയാളുറങ്ങിപോയി..

പട്ടി ഓരിയിട്ടെന്ന്,

കുറച്ചകലെ നിന്നൊരു വീട്ടിൽ നിന്നും

പഴയ മുത്തച്ഛനും,

കാലം കോഴി കൂവിയെന്ന്,

പഴയ മുത്തശ്ശിയും

പരസ്പരം പറഞ്ഞു!

സാധൂകരണമെന്നോണം,

അയാളുടെ വീട്ടുമുറ്റത്തെ മാവിന്റെ

കൊമ്പൊന്നൊടിഞ്ഞു വീണു